Die Schuddgogerer
Ein fränkisches Bubenstück von Helmut Haberkamm

Boggatsch und Rußer, zwaa ganza Scheena. Zwaa Schuddgogerer wie ausm Bilderbuch. Zwaa Schroddblatz-Koryphäen, die wu sich auskenna mit dem aldn Zeich und dem ganzn neimodischn Graffl. Die kenna a Lied dervoo singa, des Gude hasd! Zwaa Sperrmüllspezialisdn. Diplom-Grembl-Gruusch-und-Glumb-Verwerter.

Zwaa Seelengogerer. Zwielichdi und ausbichd. Zwaa schräche Vögel auf der schiefn Bahn. Den aan verfolng seine dausend Zibberle und Maleer, der ander draamd scho von der nächsdn Leibspeis. Wenn dem aan die Galln kocht, läffd dem andern scho des Wasser im Mund zamm.
Zwaa Erzgogerer hald.

Gogern: a fränkisches Leemsbedürfnis. A Seelenlust. A Heimsuchung.
Die artgerechte fränkische Haltung: In alles neigogern, worscht um wos daß gehd.
A weng wos zum Rumgogern gibbds immer. Mer kann die annern wos vorgogern, des wossi goor net heern wolln, wos obber amoll gsochd kerd, wall sunsd sachds ja kanner. Mer kann mumpfeln, glotzn und noochgogern, wenns widder ganz annersch kumma is, als wimmer dengd hadd...
Die aan sinn Daumgogerer (wie die Taubenzüchter) oder Raumgogerer (wie die Innenarchitekten), die annern sinn Draumgogerer (wie die Psychologen und Obsthändler), oder Schraumgogerer (wie die Düfdler, die Blechausbatscher und die Gnochenzammrichder).
Oder eem Schuddgogerer.
A Gogerer steggd in am jeden vo uns.

Ja, mir sinn die Schuddgoger.
Abkömmling vom Stamm der Gogerer.
Abfallbiraadn und Bordstaageier.
Kabbidäne vom Strassnrand.
Wallfohrer zum altn Eisn.
Die Schuddridder in Harnisch und Keddnhemmerd!
Mid Boddschamberhelm und harda Bandaaschn!
Mir sinn freie Radikale, ungebunden und ungesättigt!
Die Schroddgeister voddi Schermhaufn.
Mir danzn auf zerbrochna Spiegl!